Бугун катта финал. Ҳар доим ҳам бу каби йирик турнирлар финалини ўз стадионларимизда ўтказавермаймиз. Чиндан-да тарихий кун бугун. Футбол сайтларимиз Қаршидан репортажларни бошлаб юборишди. Мен эса финал превьюсини эътиборингизга ҳавола этаман. (Сайтларда маълумотлар чиқавермагач, ўзим қоралаб қўя қолдим :))

29 ноябр. ОФК Кубоги 2011. Финал. “Насаф” – "Қувайт СК"

Учрашув ўтказиладиган жой: "Насаф" Марказий стадиони.

Намойиш этилади: “Спорт” телерадиоканали. Соат 19 00да.

Рақиб ҳақида маълумот

Қувайтнинг энг номдор жамоаларидан бири саналган “Қувайт спорт клуби” Каифан шаҳарчаси шарафини ҳимоя қилади. Клуб 1960 йилнинг 20 октябрида ташкил топган. Жамоа уй учрашувларини 18500 томошабинга мўлжалланган “Қувайт Спорт клуби” стадионида ўтказади.

Жамоа Қувайт премьер лигасида ўн маротаба чемпион бўлган, тўққиз бор Қувайт Амири кубогини, беш бора Қувайт шаҳзодаси кубогини қўлга киритган.

Халқаро майдондаги энг катта муваффақияти – 2009 йили ОФК кубоги ғолиби бўлган. Демак, қувайтликлар иккинчи бор ОФК кубоги финалида баҳс олиб борадилар.

“Қувайт СК” халқаро ўйинларни Осиё чемпионлар лигаси баҳсларида бошлашган. Улар қитъамизнинг энг нуфузли турнирида тўрт маротаба иштирок этишган.

2009 йилдан бошлаб эса ОФК кубоги учрашувларида қатнашиб келишади. Эътибор беринг, улар дастлабки уринишда мусобақанинг бош совринига сазовор бўлишган.

Жамоанинг ОФК кубогидаги иштироки статистикаси:

Ўтказган ўйинлари: 28

Ғалаба: 16

Дуранг: 9

Мағлубият: 3

Тўплар нисбати: 51-25

Энг йирик ғалабаcи: 7:1

Энг йирик мағлубияти: 1:3

Кимлардан хавфсираш лозим?

Жамоа етакчилари сифатида биринчи навбатда легионерларни санаб ўтиш мумкин. “Насаф” дарвозасига асосий хавф бразилиялик Коутиньо ва кот-д’ивуарлик Борис Каби томонидан содир этилади. Рақиблар устози ўйинни бошқаришда малилик Лассана Фанедан фойдаланади. Шунингдек, таркибда Қувайт миллий терма жамоасининг бир нечта аъзоси бор. Ҳимоячилари бақувват ва бўйдор. Иккинчи қаватда яхши ўйнай олишади.

Бугунги учрашувга бошланғич таркибда тахминан қуйидаги футболчилар тушади:

Дарвозабон: Холид Ал Фадхли; ҳимоячилар: Ёқуб Абдуллоҳ, Лассана Фане, Фаҳад Шахин, Носир Ал Шаққатҳ; ярим ҳимоячилар:  Сами Ал Санеа, Рафат Али Аҳмад Жабер, Жараҳ Ал Атаиқи, Ҳусайн Ал Шаммари; ҳужумчилар: Коутиньо, Борис Ландри Каби.

“Насаф” ҳақида

Қаршиликлар ушбу мавсумни ҳар қачонгидан ҳам яхши ўтказяпти. 2001/02 йилги мавсумда “Насаф” Осиё чемпионлари кубогида 3-ўринни қўлга киритганди. Мана бу сафар ОФК кубогида чемпионликни қўлга киритиш имконига эга бўлиб турибди. Анатолий Демьяненко шогирдлари Ўзбекистон чемпионати баҳсларида ҳам 2-ўринни банд этиш имконини сақлаб турибди. “Насаф”нинг шу вақтга қадар чемпионатимизда қайтд этган энг яхши натижаси 3-ўрин ҳисобланади. Қаршиликлар 6 бора чемпионатимизнинг бронза медалига эга чиқишган. Шунингдек, жорий мавсумда Ўзбекистон кубоги финалига чиқишни ҳам уддалашди. Хуллас, 2011 йилни “Насаф” учун ҳар қачонгидан муваффақиятли мавсум деб атаса бўлади. Жамоанинг айниқса, ОФК кубогида кўрсатаётган натижалари қувонарли. Ўтган йили нимчорак финалдан юришини тўхтатган қаршиликлар бу сафар финалга қадар етиб келишди ва бу натижа билан кифояланиб қолишмайди деган умиддамиз.

Жамоанинг ОФК кубогидаги иштироки статистикаси:

Ўтказган ўйинлари: 18

Ғалаба: 12

Дуранг: 3

Мағлубият: 3

Тўплар нисбати: 47-12

Энг йирик ғалабаcи: 9:0

Энг йирик мағлубияти: 1:2, 0:1.

Ўзаро ўйинлар

“Насаф” ва "Қувайт СК" бир бора ўзаро тўқнаш келишган. Осиё чемпионлар кубогининг 1/4 финали БААда ташкил этилганди. Унда тўрт жамоа давра тизимида биттадан ўйин ўтказиб, гуруҳда биринчи ва иккинчи ўрин соҳибларини аниқлашган. 2002 йилнинг 6 февралида “Насаф” - “Ал Қувайт” учрашуви 1:1 ҳисоби билан якун топган. Гуруҳ ўйинлари натижасига кўра “Насаф” ва Эроннинг “Истиқлол” жамоаси ярим финалга йўл олган, қувайтликлар шу ерда мусобақани тарк этган.

Дуэл

Финал ўйинида жамоаларнинг қайсидир етакчи футболчилари ўртасида эмас, Анатолий Демьяненко ва Драган Талажич ўртасида баҳс кечади. Иккаласи ҳам халқаро ўйинларда тажриба орттирган мураббийлардир. Талажич бош мураббийлигида Саудия Арабистонининг “Ал-Иттиҳод” жамоаси 2004 йилда Осиё чемпионлар лигаси учрашувларида бош совринга сазовор бўлган. Демьяненко эса Европа чемпионлар лигаси “ҳаво”сини олган мутахассис ҳисобланади. Бугунги натижада айнан уларнинг роли бошқаларникидан кўра юқорироқ бўлади.

Тўғрисини айтсам, Анатолий Демьяненконинг ўйин услуби менга унчалик ёқмайди. Аммо жамоанинг имкониятларидан келиб чиқиб, керакли натижани қайд этиш учун бу услубдан яхшироғи бўлмаса керак. “Насаф” яққол ҳимоявий ёки ҳужумкор ўйин кўрсатмайди. Аммо ўз дарвозасини яхши қўриқлайди, рақибларга эса керагича гол ура олади. Яъни, майдон марказини қўлга олади. Бу – Демьяненконинг услуби. Балки айнан ушбу ўзига хослик бизга чемпионликни тақдим этар!

ФИКР БИЛДИРИНГ:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

БИЛДИРИЛГАН ФИКРЛАР: