Бўлар иш бўлди. Биз ҳийла ишлатмоқчи эдик. Ватан шаъни учун кетадиган катта “жанг”ларда моҳирлик билан қўлланилган ҳийла ўзини оқлаши мумкин деб зйлагандик. Ҳамма гап ана шу ҳийлани ишлатишдан қўзланган мақсадда, деб ўзимизни алдагандик. Мақсад эзгу бўлса, воситанинг аҳамияти йўқ...(ми?) деб ўйлагандик. Аммо... Аммо ҳийла ишлатишда тажрибамиз йўқлиги панд бериб қўйди. Бизга бу йўл тўғри келмас экан.

Умуман олганда-ку, эски ғалваларнинг кутилмаганда, яна ҳам қизиғи, деярли бир вақтнинг ўзида юзага чиқиши инсонда шубҳа уйғотади.... Бир фильмда айтилганидек, “Шпакнинг магнитафони, элчининг медальони...” деганларидек.... (Ироққа техник мағлубият ёзилиши, Тожикистон миллий терма жамоаси билан ўиндаги “картошка” байрамини тўсатдан энди кўриб чиқилиши...)

Шахсан менинг ўзим ҳам Абрамовнинг “ҳийла”сини ўшанда қўллаб-қувватлагандим. Терма жамоамиз ташкил этилганидан бери ўзи иштирок этган барча мусобақаларда доимо “таёқдек тўғри” бўлиб келди. Айёрлик, симуляция деган нарсалар бизнинг юртда вояга етган футболчилар учун етти ёт бегона бўлгани учун, футболдаги бахтимизни фақат ва фақат яшил майдонда, ҳалол ва очиқ “жанг”да излашга ҳаракат қилиб келдик. Терма жамоамиз футболчи-ю мураббийлари араб давлатлари терма жамоалари билан ўйинларда “арабча ҳунарлар”ни кўриб, дастлаб довдираб қолаверишди... (1998 йил ЖЧ саралаш баҳсларидаги БАА билан Тошкентдаги ўйиндаг “даҳанаки” жанглар, 1999 йил БААда ўтган ОЧга чиқиш учун саралаш ўйинларидаги “арабча” ҳунарлар, 2007 йил Малайзиядаги ОЧ чорак финалида С.Арабистонига қарши ўйиндаги ҳакамнинг ғалабамизга “қарши”ликлари ва ҳ.к...)

Бунинг оқибатида, биз араб терма жамоаларидан бир калла устун бўлсак ҳам, буни амалда исботлай олмай,ғалабадан қуруқ қолавердик... Аммо Абрамовгача терма жамоада ишлаган барча мураббийлар ўйин тақдирини фақатгина футбол ўйнаб ҳал қилишга интилиб келишди. Юқорида айтилганидек, кўп ҳолларда фақат футбол ўйнашнинг ўзи натижага эришиш учун камлик қилиб қолаверди... Аммо бугунга келиб биз “осиёча футбол”ни жуда яхши ўзлаштириб олдик. Эндиликда “арабча ҳийлалар”га қарши қандай йўл туитшни барчамиз биламиз. Текор гол ва тўпни назорат қилиш! Эътибор беринг, бу йўл қандайдир “ҳийла”га қарши “ҳийла” эмас. Шунчаки, футболнинг асосий шарти бўлган гол киритиш! 
Абрамов терма жамоа тепасига келганидан сўнг нима қилди? Биринчи навбатда, ички муҳитни яхшилади. Якдил ва яхлит жамоа туза олди. Бу ижобий ҳолат. Кейин кўп ҳолларда шу пайтгача бизга бегона бўлган майдон ортидаги “ҳийлалар”ни ҳам ишга сола бошлади. Ўзбек футбол мухлислари даставвал Абрамовнинг бу қарорларига тушуна олишмади. Бу ўзбек мухлислари учун ёт ҳолат эди. Бунга ўрганмагандик. Кейин ўша ҳийлаларнинг ортидаги мақсад тушунилгач, улар самара кўрсатадигандек тасаввур ҳосил қилинди. Юқорида айтганимдек, мен ҳам бу йўлни тўғри деб ўйлагандим. Олдимизга улкан мақсадлар қўйилган экан, нега энди ҳар қандай воситани ишга солиб кўрмаслик керак экан? Энг муҳими, бу восита бизга фойда келтирса бўлгани. Аммо... Аммо футбол барибир ҳалолликни яхши кўрар экан.... Футболда ғалабага эришиш учун фақат ва фақат ФУТБОЛ ўйнаш керак экан! Футболнинг қоидаларини эса сиз яхши биласиз. Ҳамма билади буни. Ҳатто, Абрамов ҳам.

Тўғри, футболда ёзилмаган қоидалар ҳам бор. “Фейр плей” деганларидек.... Сўнгги пайтларда, бу қоидаларга баъзи жамоалар, асосан осиёлик жамоалар, яна ҳам аниқроқ қилиб айтадиган бўлсак, араб жамоалари амал қилмасдан ҳам натижаларга эришиш мумкинлигини исботлашмоқда. Футболда “ўйин унутилади, натижа тарихда қолади” деган гап бор. Юз фоиз тўғри. Қўшиламан. Лекин.... Лекин бир кун келиб ғирром йўл билан ғалаба қозониб, Кубокни боши узра кўтарган футболчиларнинг ўзлари, ғалабага лойиқман деб ҳисоблашармикан.... Қўлга киритган медалларини бўйниларига тақиб, мухлисларнинг кўзига тик қараган ҳолда бемалол айланиб юра олишадими? Ўша юртда улғаяётган ёш футболчилар бу акаларидан қандай ўрнак олишади? Улар учун футболдаги ғирромлик оддий ҳол бўлиб туюлиб қолмайдими?

Бизга керакми шундай ғалабалар? 

Юртимиздаги ҳамма футбол сайтларида шов-шув, қий-чув, тўполон. Ўзбекистон терма жамоасининг 5та ўйинчиси ФИФА томонидан жазоланибди. Нима бўпти? Ваҳима кўтаришга арзимайди. Биз бор йўғи 4-босқчининг биринчи турида Ш. Муллажонов, С. Жепаров, И. Тўхтахўжаев, В. Галиулин, С. Турсуновларнинг хизматларидан фойдалана олмаймиз. Тўғри, бу футболчилар терма жамоамизнинг асосини ташкил қилади. Аммо “Незаменимых не бывает” деган мақол бор русларда. Ҳеч бўлмаганда бир ўйинга уларнинг ўринин босадиган футболчиларни топса бўлади. 4-босқичнинг биринчи турида Австралия ёки Япония каби кучли терма жамоага қарши майдонга тушишимиз мумкинлиги ҳам бизни унчалик хавотирга солмаслиги керак. Олимпиячиларимиз ҳам анча пишиб боришяпти. Очиғи, бу Абрамов ўзи “пиширган ош”. Ўзи чиройли қилиб “сузиб” олади. Бошқа иложи ҳам йўқ.

Ҳамма гап бошқа ерда. ФИФАнинг бу жазосини “огоҳлик қўнғироғи” деб қабул қилишимиз керак назаримда. Биз бундан бу ёғига фақат ва фақат майдондаги кучли ва тартибли ўйин билан ғалаба қозонишни ўйлашимиз зарур. Ғалаба учун майдон ташқарисидан турли йўлларни изламаслигимиз керак. Футбол ҳалолликни яхши кўришини бизларга эслатиб қўйяпти. Буни унутмаслигимиз зарур! Гарча ноҳақликлар унда учраб турса ҳам....

Майли, ўша “ас-Сад”лар ғирром йўл билан Осиё чемпионлар лигаси ғолиблигига эришаверсин. Майли, БАА билан Австралия ўзаро келишиб, ўйин кунларини олдинга сураверсин. Майли, Ироқ иккита сариқ карточка олган ўйинчиларини майдонга тушириб, кейин бунинг ортидан БАА уч очко ва учта голли бўлиб олаверсин... Биз олдимизга қўйган мақсадимиз сари фақат тўғри йўлдан одимлаб боришимиз керак! Гарчи манзилга олиб борувчи қинғир-қийшиқ сўқмоқлар бизни ўз домига чорлаб турса ҳам! У сўқмоқлар хавфли. Жуда хавфли... Манзилга етай деганда, жарга қулатвориши мумкин! Биз қийин ва узоқ бўлса ҳам энди фақат тўғри йўлдан борамиз! Бошқа йўллар бизга тўғри келмас экан. Шундай эмасми, Вадим Карленович?

ФИКР БИЛДИРИНГ:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

БИЛДИРИЛГАН ФИКРЛАР: