18 май, жума | Русская
| 18.05.12 16:00 Олий лига Нефтчи -:- Шўртан | 19.05.12 23:45 Чемпионлар лигаси Бавария -:- Челси |
|
Бобур Мирзо
Полимонолог |
Яна-да Реал ҳаёт | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| Киритилган сана: 2012-02-09 23:40 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
Ёмонларни эҳтиёт қилинг!
Ёмон йўқ бўлса, яхшининг қадри билинмай қолади.
Ўткир Ҳошимов
Жорий мавсум Мадриднинг Реали ўзи қатнашган 4 мусобақа – Испания Суперкубоги, Ла-лига, Копа дел Рей ва Европа Чемпионлар Лигаси баҳсларида жами ҳисобда 35 та ўйин ўтказиб, уларнинг 4 тасида(!) мағлубиятга учради: 2 марта Испания чемпионатида, 1 мартадан кубок ва суперкубок баҳсларида. ЕЧЛда эса Ювентуснинг мағлубиятларга кўра А –Серияда қилиб юрган натижасини кўрсатиб турибди. Ўтган гал Қироллик клуби қозонаётган ғалабаларнинг энг асосий сабабчилари ҳақида тўхталгандим. Қизиғи, ўша гапларнинг ёзилишига 35 ўйинда қозонилган 28 ғалабамас, аксинча, учралган 4 тагина мағлубият сабаб бўлганди. Чунки бу мағлубиятлар оддий мағлубиятлар эмасди. Шунақа аламли мағлубиятларки, фантастик ғалабалардан завқланишга раҳна солиб, муваффақиятлар қадрини тушириб турганди. Яхшиям шу муваффақиятсиз ўйинлар бор экан, баҳонада яхши ўйинларни эслаб олдик. Энди эса жорий мавсумда учралган мағлубиятларнинг бош айбдорларини муҳокама қиламиз:
Касильяс
Жамоа қачон мағлуб бўлади? Рақибга қараганда кўпроқ гол ўтказиб юборса. Гол кимнинг айби билан урилади? Бутун жамоанинг, асосан, дарвозабон ва ҳимоячиларнинг айби билан, шундайми? Жаҳоннинг кетма-кет 4 карра энг яхши дарвозабони Икер ҳозиргача учралган 4 тала мағлубиятда ҳам ўз маҳорати ва обрўсига жиддий путур етадиган даражадаги хатоларни қилмади, лекин у айбдор! Биласизми, нега? Чунки у – сардор! Айнан мағлубиятга учралган ўйинлар пайти Икерда ҳақиқий сардорлардек ўз жамоасини бошқариб туриш, айниқса, ҳимоячиларга ҳам дарвозабон ҳам сардор сифатида сўзини ўтказиш, назоратда сақлаш хислатлари йўқолиб қолди. Кўп ҳолларда, айнан, Касильяснинг ҳам ўз жамоадошлари, ҳам рақибга нисбатан бўшашиб қолиши ўйин тизгинининг қўлдан бой берилишига олиб келди, деб ҳисоблайман.
Алтинтоп
Марказий ҳимоядаги бўшлик ва бўшлиқдан қутулиш мақсадида Рамоснинг қанотдаги жойини марказга ўзгартирилиши, Арбелоанинг жароҳати Моуриньони ҳимоянинг ўнг қанотида турли экспериментлар ўтказишга мажбур қилди. Ёзда мадридликлар сафига эркин агент сифатида текинга келиб қўшилган Ҳамит жароҳатидан тўла фориғ бўлгач, вақти-вақти билан майдонга тушиб, ўзига таниш бўлган ярим ҳимоя ва ҳужумда баҳоли қудрат ўйин кўрсатаётган эди. Лекин мураббийнинг қарори билан ҳал қилувчи ўйинлардан бирида ҳимояда ўйнаши, менимча, ўзини оқламади. Ўзига ёт бўлган амплуада ўйнаганидан келиб чиқиб айтганда, кутилганидек ўйнагандир, лекин фурсати келганда ўз имкониятларидан бир бош баланд сакраб, кутилмаган ўйинини намоён қилолмагани барибир панд берди.
Пепе
Зиданнинг таърифи билан айтганда, “майдон ташқарисида хулқи намунали, ўқимишли, лекин ўйинлар пайтида ўзини унутиб қўядиган” бу йигитни 4 тала мағлубиятда ҳам бемалол айблаш керак(мумкин, демадим). Тўғриси, ўта муҳим ўйинлар пайтида Пепега тўп келиб тушиши ёки унинг рақиб томон интилишини хавотир тўла бир кўз(2-кўзим юмилган бўлади) билан кузатадиган бўлиб қолдим. Марказий ҳимоячи учун зарур бўлган узун бўйи ва йирик гавдасидан рақибни чирпирак қилиб учириб юборишда эмас, ҳаводаги яккакурашларда фойдаланса бўлмасмикин? Ғалабага эришган ўйинларда кўпинча буни уддалайди-ку! Худо берган узун оёқларидан каратэ усулида зарба бериш ёки беозор, миттигина бармоқчаларни ваҳшийларча босиб ўтишдамас, бир ҳаракат билан тўпни рақибдан олиб қўйиш ёки тезкор ҳужумчиларга етиб олишда фойдаланса бўларди. Ахир, буни аъло даражада уддасидан чиққанини кўп кўрганмиз-ку!
Карвальо
Рикардонинг ҳимоячилик маҳоратига алоҳида эҳтиромимни билдирган ҳолда айтаманки, португалиялик ўзига билдирилган ишончни ажойиб тарзда оқлаяпти, фақат алоҳида муҳим ўйинлардан ташқари. 4 тала аламли мағлубиятда ҳам унинг ёши ўтганлиги, тезкор эмаслиги панд берди.
Рамос
Пепе каби бир зумда ўзгариб қоладиган бу йигитни мағлубиятга учралган ўйинлар пайти умуман таниб бўлмай қолади. Назаримда, Серхио жаҳл отига минган пайти ҳеч кимни танимайди, тан олмайди. Жамоадошлариниям, Моуриньониям. Бу қизиққонлиги эса аксар ҳолларда унинг ўзидан ҳам кўра кўпроқ жамоа зарарига ишламоқда. Ортиқча асаббузарлик оқибатида ўйинга жамланган фикридан чалғиб, тизгинни қўлдан бериб қўйиши ёмон. Бўлмасам, айнан ўзининг услубида гол киритган рақибга имкон бермасликни бемалол уддалаган бўларди.
Коэнтрао
Амплуаси эътибори билан аслида Марселога ўриндош сифатида сотиб олинган Фабио биз фикр юритаётган барча ўйинларда асосий таркибда ўйнади. Марсело тушсаям, тушмасаям. Ўзига нотаниш ўнг қанотда ўйини қовушмади, кўплаб хатоларга йўл қўйди. Ўзига таниш чап қанотда рақибга кўпинча имкониятни бой бериб қўйди, иложсизликдан қилган баъзи ҳаракатлари билан эса бир кулгуга қолди, бир ғазабга учради.
Марсело
Учралган мағлубиятларнинг тенг ярмида унинг айби бор. Ҳужумга ўтишни жуда яхши кўрувчи бу учар йигит ҳимояда кўпинча қўполлик эвазигагина рақибдан “устун” келади. Қолаверса, барча Реал ҳимоячилари каби унга ҳам ўта қизиққонлик “касал”и юққан. Балки бир оғиз ўз сардоридан маслаҳат олиб, ўзида бунақа “дард”ларга нисбатан иммунитетни шакллантирса бўлармиди...
Хедира
Таянч ярим ҳимоячиси учун сариқ карточка олиш одатий ҳол дейишади, лекин қизилини олишдан ўта эҳтиёт бўлиш керак. Айнан Самининг немисча интизомни унутиб қўйиб, арабча қизиққонлик кўрсатгани ўртамиёна клубга учралган сенсацион мағлубиятга жуда катта таъсир қилганди.
Диарра
Ўз меҳнаткашлиги, тиниб-тинчимаслиги билан ном қозонган Лассананинг обрўсига қилган қалтис ҳаракатлари, қўполликлари ва тинмай олган карточкалари соя солиб туради. Рақиб ҳужумларини бузиб турувчи амплуа эгасига бу хос ҳолат, дейиш мумкиндир, лекин Диарранинг айби аввал кераксиз вазиятда карточка ишлаб олади-да, кейин эҳтиёт бўлиб ўйнашга мажбур бўлганидан муҳим вазиятларда қалтис ҳаракатдан чўчиб ўзини четга олади, қўрқиб ўйнайди.
Алонсо
Ўзининг хотиржамлиги, барқарорлиги билан жамоа юрагига айланиб улгурган баск ўғлони аламли мағлубиятлардан қанчалик азият чекишини, руҳан мувозанатдан чиқиши мумкинлигини кўрсатиб қўйди. Кетма-кет тўп йўқотишлар, ноаниқ тўп оширишлар, тушунарсиз жарима зарбалари... Рости бунақа Хаби унинг ўзига ҳам ёқмаса керак.
Кака
Ўйин амалиёти камлиги ҳақида ҳар тарафда бетиним бонг урилган Рикардо мағлубиятларнинг биттагинасида асосий таркибда тўп сурди. Ўртамиёна жамоага қарши ўйинда майдонда нима қилиб юрганини унутиб қўйди ва ҳақли равишда амаштирилди.
Ўзил
Реалнинг энг асосий плеймейкери Ўзил, жамоасининг энг асосий ўйинларида негадир ўзини йўқотиб қўйди. Асосий таркибда ҳам, заҳирадан тушиб ҳам ўзини бошқа ўйинлардагидек кўрсата олмади. Энг яхши ассистентлик қобилияти ҳам муҳим ўйинларда учралган мағлубиятларда қаёққадир ғойиб бўлиб қолгандек тасаввур уйғотди.
Ди Мария
- Оширилган тўпни эгалла, алдаб ўт ёки йиқил! Алдаб ўт! Алда! Ўт! Ўтолмасанг йиқил! Йиқил! Яна йиқил!...
Юқоридаги гаплар охирги мағлубиятдан ташқари барча 3 муваффақиятсиз ўйинларда асосий таркиб футболчиси ўлароқ жавобгар бўлган Анхелнинг ўша 6 тайм давомида миясини чулғаб олган фикрлар эди, наздимда.
Роналду
Қизиқ ҳолат. Криштиану биз муҳокама қилаётган барча ўйинларда қатнашганини 100% билсам ҳам, барибир ўша ўйинлар қайдномасига бир назар ташлаб, унинг исмини яна қайта қидириб кўрдим. Голлар урганини эслайман. Ҳа, адашмаган эканман, Роналду Реал мағлубиятга учраган барча ўйинларда ростан майдонга тушган экан. Лекин барчасида ўйнаганми, йўқми билмайман. Тушунгандирсиз?
Игуаин
Кўпинча йўқ жойдан вазият яратиш орқали жамоасига қимматли ғалабларни тақдим қилиб юрган суперҳужумчи баъзан яққол вазиятларни кўкка совуриши билан ҳайрон қолдиради. Агар бу вазият ўта муҳим ўйинда бой берилса, ҳайронлик ўрнини ҳафсаланинг пир бўлиши эгаллайди. Тўғри, Гонсало мағлубиятга учралган ўйинларнинг биргинасида майдонга асосий таркибда тушди. Лекин ҳужумчи сифатида умуман кўринмади.
Бензема
Барча 4 мағлубиятда иштирок этганлар орасида энг кам эътироз Каримга бўлиши керак. Лекин кам бўлса-да, ҳарқалай айби бор. Ҳужумчидан ҳар доим талаб қилинган натижа – гол уриш! Тўпни дарвозага орқа ўгирган ҳолда қабул қилиш ва ичкарига ёриб кириб гол уришга ўрганган кўнгилга жамоадошларидан ҳар доим сўнгги пасни кутиб ўтириш ҳар доим ҳам ёқмайди. Баъзан нотўғри жой танлаши, тушунмай қолиши шундан бўлса керак. Қолаверса, худди “Лион”дагидек узоқдан зарбалар бериб, ажойиб голлар киритишини кўрсак бўлармиди...
Сиз билан Реалнинг жорий мавсумдаги яхши-ёмон кунларини эсладик. Яхши кунларнинг, яхши онларнинг, яхшиликнинг, яхшиларнинг қадри қачон билинади? Ёмон кунларда, ёмон онларда, ёмонлик кўрганда, ёмонлардан тўйганда, шунақами? Биз шунақа хилқатмизки, энг яхши кунларимизни бошимизга ташвиш тушгандагина энтикиб эслаб қоламиз. Саломатликнинг қадрига дардга чалиниб етамиз, дўстнинг қадрига душманга йўлиқиб етамиз. Ўз-ўзидан, муваффақиятларнинг қадри ҳам омадсиз, қора кунларда билинади. Муваффақиятсизликлар эса яхши кунларда эсланади. Истагим, эртанги кунимиз бугунимиздан янада яхшиланиб борсин, шунақанги муваффақиятларга тўла ўтсинки, ҳар янги кунимизнинг энг яхшилигидан энтикиб, ўтган кунларимизнинг “ёмон”лигини бир эслаб қўяйлик!
ФИКР БИЛДИРИНГ: ФИКР БИЛДИРИШ УЧУН РЕГИСТРАЦИЯДАН УТИШ КЕРАК! БИЛДИРИЛГАН ФИКРЛАР:
|
МУАЛЛИФНИНГ БОШҚА МАҚОЛАЛАРИ
БЛОГГЕРЛАР |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
Отабек Эшмаматов
«Чемпион» ҳакам
Coolman&KvarTeT
Mixail_An
YURGEN_GEDE|
|
|
